ایرانی صوبے آہواز میں فوجی پریڈ پر حملہ، 24 شہید متعدد زخمی

صوبہ آہواز میں فوجی پریڈ کے دوران حملے میں ہلاکتوں کی تعداد 24 ہوگئی جب کہ خواتین اور بچوں سمیت 50 سے زائد افراد زخمی ہیں۔

ایرانی میڈیا کے مطابق جنوب مغربی صوبے آہواز میں فوجی پریڈ جاری تھی کہ اس دوران مسلح شخص کی جانب سے فائرنگ کی گئی۔

میڈیا رپوٹس کے مطابق حملہ آوروں نے فوجی پریڈ کے دوران پیچھے سے فائرنگ کی جس کے نتیجے میں 8 فوجی شہید جب کہ خواتین اور بچوں سمیت متعدد افراد زخمی ہوئے۔

مقامی میڈیا کے مطابق حملے میں زخمی ہونے والے بعض افراد دم توڑ گئے ہیں جس کے بعد ہلاکتوں کی تعداد 24 ہوگئی ہے جب کہ خواتین اور بچوں سمیت 50 سے زائد زخمی آہواز کے مختلف اسپتالوں میں زیر علاج ہیں۔

مقامی میڈیا کا کہنا ہےکہ واقعے کے بعد سیکیورٹی فورسز نے فوری کارروائی کرتے ہوئے چار سے پانچ دہشت گردوں کو ہلاک کردیا۔

ایران کے سرکاری ٹی وی کا کہنا ہے کہ حملہ عسکریت پسندوں کی جانب سے کیا گیا ہے۔

ہفتہ دفاع مقدس کی مناسبت سے اہواز میں صبح 8:30 پر مسلح افواج نے شاندار پریڈ کا آغاز کیا، ادھا گھنٹہ بعد دہشت گردوں نے حملہ کیا جس میں سپاہ پاسداران انقلاب کے10 اہلکار جام شہادت نوش کرگئے ہیں اور20 زخمی ہوگئے ہیں۔

سیکیورٹی فورسز کی جانب سے فوری طور پر جوابی کارروائی کی گئی۔ ملزمان اور فورسز کے درمیان جھڑپ تقریبا 10 منٹ تک جاری رہی۔ سیکیورٹی فورسز کی اضافی نفری جائے وقوعہ پر پہنچ گئی ہے اور علاقے کا محاصرہ کرکے سرچ آپریشن شروع کردیا گیا ہے۔