ایران: فوجی پریڈ پر دہشت گردوں کا حملہ، سپاہ پاسداران کے 10اہلکار شہید 20 زخمی

اسلامی جمہوریہ ایران کے صوبہ خوزستان کے مرکزی شہر اہواز میں فوجی پریڈ پردہشت گردوں نے حملہ کیا ہے جس کے نتیجے میں سپاہ پاسداران کے 10اہلکار شہید اور متعدد زخمی ہوگئے ہیں۔

زرائع کے مطابق صوبہ خوزستان کے مرکزی شہر اہواز میں اسلامی جمہوریہ ایران کی مسلح افواج پرنامعلوم افراد نے حملہ کرکے سپاہ پاسداران کے 10 اہلکار شہید اور20 زخمی ہوگئے ہیں۔

اہواز شہر میں دہشت گردوں نے عمارت کے پچھلے حصے سے ہفتہ دفاع مقدس کے حوالے سے ہونے والی فوجی پریڈ پر فائرنگ کی ہے۔

ہفتہ دفاع مقدس کی مناسبت سے اہواز میں صبح 8:30 پر مسلح افواج نے شاندار پریڈ کا آغاز کیا، ادھا گھنٹہ بعد دہشت گردوں نے حملہ کیا جس میں سپاہ پاسداران انقلاب کے10 اہلکار جام شہادت نوش کرگئے ہیں اور20 زخمی ہوگئے ہیں۔

سیکیورٹی فورسز کی جانب سے فوری طور پر جوابی کارروائی کی گئی۔ ملزمان اور فورسز کے درمیان جھڑپ تقریبا 10 منٹ تک جاری رہی۔ سیکیورٹی فورسز کی اضافی نفری جائے وقوعہ پر پہنچ گئی ہے اور علاقے کا محاصرہ کرکے سرچ آپریشن شروع کردیا گیا ہے۔